Fréttir úr starfseminni

Niðurstöður rannsóknarverkefna kynntar
Þann 30. mars voru niðurstöður tveggja rannsóknaverkefna Varar kynnt á ráðstefnunni Nytjastofnar og náttúra á grunnsævi sem haldin var á vegum Hafrannsóknarstofnunarinnar í Norræna Húsinu. Á ráðstefnunni greindi Erla Björk Örnólfsdóttir frá helstu niðurstöðum rannsókna á beitukóngi í Breiðafirði í samnefndu erindi og René Groben kynnti framvindu rannsóknar á greiningu fæðugerða kræklings (Mytilus edulis) og hörpudisks (Chlamys islandica) í Breiðafirði með sameindaerfðafræðilegum aðferðum. Nánari upplýsingar um dagskrá ráðstefnunnar má finna á heimasíðu Hafrannsóknarstofnunarinnar.

Þann 29. mars hélt Erla Björk Örnólfsdóttir erindi á ársfundi stofnunar rannsóknasetra Háskóla Íslands sem haldinn var á Hótel Selfossi. Yfirskrift ársfundar var Hlutverk rannsóknasetra í samfélaginu. Erla nefndi erindi sitt, Blómstrandi þekkingarsetur: Hvað hafa þau að geyma? Nánari upplýsingar um dagskrá ársfundar má finna á heimasíðu Hafrannsóknarstofnunarinnar.


Nýr starfsmaður ráðinn til starfa
Kristen Marie Westfall hóf störf hjá Vör þann 7. mars síðastliðinn. Kristen hefur doktorsgráðu í sjávarlíffræði með áherslu á notkun sameindaerfðafræðilegra aðferða til að svara vistfræðilegum spurningum. Hún vann rannsóknarverkefni sitt við Nýsjálenskan Háskóla, Victoria University of Wellington, en Kristen er kanadísk að uppruna. Hér mun hún nýta þekkingu sína til að vinna að rannsóknarverkefnum tengdum beitukóngi og öðru sjávarfangi.


Sumarstörf hjá Vör

Vör auglýsir eftir sumarstarfsmönnum til vinnu við rannsóknir á svifþörungum og dýrasvifi í Breiðafirði. Endilega kíkið á starfslýsingu í umfjöllun um eiturþörunga og DNA og gagnasafn um dýrasvif. Þátttaka í sýnatökuferðum út á Breiðafjörð er í boði.

Auglýsing um dýrasvif
Auglýsing um svifþörunga


Kynning á rannsóknum á þroskun beitukónga
Rannsóknir á beitukóngi í Breiðafirði voru kynntar á fagráðstefnu samtakanna Society for Integrative and Comparative Biology 3.-7. janúar í Charleston, Suður Karólínu. Þar kynnti Kathryn Smith niðurstöður rannsókna sinna sem byggja á vinnu hennar frá síðasta ári þegar hún safnaði beitukóngseggjum í Breiðafirði til rannsókna á þroskun beitukónga. Katie flutti eggjamassa beitukónga með sér til Bretlands og þar framkvæmdi hún tilraunir á breiðfirskum beitukóngum í rannsóknaraðstöðu við University of Southamton. Titill kynningar hennar á ráðstefnunni var Combined effects of temperature and hydrostatic pressure on the early ontogeny of the common whelk Buccinum undatum (Linnaeus, 1758); is low temperature the key to successful deep sea invasion?
Veggspjald PDF.



Fréttasafn